Вистинска драма се одвивала во текот на ноќта во трговски центар на подрачјето на Општина Центар, каде непознати лица извршиле грабеж и успеале да однесат поголема сума пари од банкомат.
Според информациите од Министерството за внатрешни работи, случајот бил пријавен во СВР Скопје на 10 јули околу 03:15 часот. Пријавено било дека неколку лица насилно го отвориле банкоматот, по што ги одзеле парите и веднаш избегале од местото на настанот.
Настанот, според првичните информации, се случил во трговскиот центар „Веро Џамбо“, а сторителите засега се непознати.
По добиената пријава, полициски екипи веднаш излегле на терен и извршиле увид. Во моментов се преземаат оперативни мерки и активности со цел да се утврди идентитетот на лицата кои го извршиле грабежот и да се обезбедат дополнителни докази.
Од МВР информираат дека случајот е во фаза на расчистување, а повеќе детали ќе бидат познати по завршувањето на истражните дејствија. Надлежните продолжуваат со работа за целосно откривање на сторителите и нивно процесуирање.
