Македонија утре ќе биде зафатена од нов бран екстремно топло време, а Управата за хидрометеоролошки работи (УХМР) најави активирање на портокалово ниво на опасност поради високите температури.
Според прогнозата, времето ќе биде претежно сончево со мала до умерена облачност, а дневните температури ќе се движат од 33 до 40 степени. Во попладневните часови на одделни места е можна појава на нестабилност проследена со краткотраен пороен дожд и ретки грмежи.
Минималните утрински температури ќе бидат меѓу 12 и 20 степени, но и во текот на ноќта ќе остане невообичаено топло. Ќе дува слаб до умерен северен ветер, кој долж Повардарието повремено ќе засилува и ќе достигнува брзина до околу 40 километри на час.
Во Скопје се очекува сончево и многу топло време со мала до умерена облачност. Утринската температура ќе се спушти до околу 18 степени, додека максималната дневна ќе достигне до 39 степени. Надлежните препорачуваат граѓаните да избегнуваат подолг престој на сонце во најтоплиот дел од денот и да внесуваат доволно течности.
