Одделот за сузбивање на организиран и сериозен криминал поднесе кривична пријава до Основното јавно обвинителство – Скопје против поранешниот министер за внатрешни работи, а сега актуелен пратеник на СДСМ, Оливер Спасовски, поради основано сомнение за „злоупотреба на службената положба и овластувањето“.
Според пријавата, додека ја извршувал функцијата министер во 2021 година, Спасовски наводно овозможил на еден правен субјект – станица за технички преглед во општина Сарај – да се стекне со противправна имотна корист од 5.565.927 денари.
Случајот се однесува на тоа дека Спасовски не донел решение за одземање на овластувањето за вршење технички преглед, иако надлежната организациска единица за граѓански работи доставила предлог за тоа. Имено, тој бил должен да постапи во рок од 15 дена од приемот на предметот, но не ја извршил службената обврска, што е спротивно на член 65 став 3 од Законот за возила и член 5 од Правилникот за начин и постапка за издавање и одземање овластување за технички преглед на возила.
Случајот сега е во надлежност на Јавното обвинителство, кое ќе ги утврдува сите околности и евентуалната одговорност на Спасовски.
