Јавен обвинител од Основното јавно обвинителство Скопје поднесе обвинение против 40-годишна жена од Радовиш поради лажно пријавување на кривично дело, по член 366 став 4 во врска со став 3 од Кривичниот законик.
Според обвинението, осомничената на 29 октомври 2025 година, од свој мобилен телефон испратила е-пошта со заканувачка содржина до службената адреса на ОУ „Крсте Петков Мисирков“ – Радовиш, во која навела дека во училиштето е поставена бомба. Иако знаела дека тоа не е вистина, со своето дело предизвикала паника и ја мобилизирала полицијата и итните служби.
По спроведената истрага, обвинителството предложи до судот да ѝ бидат определени мерки на претпазливост, меѓу кои:
- забрана за напуштање на местото на живеење,
- привремено одземање на патна исправа и
- забрана за испраќање пораки со заканувачка содржина.
Обвинителството потсети дека лажните пријави, особено оние што предизвикуваат вознемиреност и ангажман на безбедносните служби, претставуваат сериозно кривично дело за кое е предвидена казна затвор.
