Министерката за образование и наука Весна Јаневска ги отфрли обвинувањата дека Министерството ги прикрива резултатите од приемот во студентските домови, нагласувајќи дека ранг-листите се јавно објавени.
Јаневска реагираше на критиките од Левица и изјави дека се објавени листите и на примените и на непримените студенти, при што за кандидатите кои не добиле место е наведено образложение. Таа оцени дека во јавноста се пласираат дезинформации околу постапката за прием.
Како примери за кандидати кои не ги исполнуваат условите, министерката посочи студенти кои студираат седма или осма година, како и кандидати чии родители имаат високи приходи. Според неа, критериумите се однапред утврдени и јавно објавени во огласот.
Од друга страна, Левица тврди дека суштината на нивната критика е тоа што во објавените листи не се прикажани освоените бодови на кандидатите. Партијата се повикува на Правилникот за прием во студентските домови и бара јавно да биде прикажано бодирањето врз основа на кое е направено рангирањето.
Јаневска се осврна и на образовните асистенти. Според нејзината изјава, во основното образование се ангажирани околу 1.348 асистенти, а во средното 166, додека постапката за дополнителни ангажмани продолжува.
Министерката најави и дека во ООУ „Киро Глигоров“ наскоро треба целосно да продолжи наставата со физичко присуство, откако во текот на викендот ќе бидат завршени дополнителните училници.
