Попладнево силно невреме го зафати Скопје, оставајќи зад себе хаос и големи проблеми. Граѓаните пријавуваат паѓање на дрвја, откорнати кровови, прекини во снабдувањето со струја и појава на пожари на повеќе локации.
Еден од најсериозните инциденти се случи над Нерези, каде силен пожар зафатил поширок дел и поради ураганскиот ветер со забрзана брзина се шири кон Водно. Пожари се пријавени и кај хотелот „Александар Палас“, во населбата Нерези, па дури и во Капиштец, каде жиците предизвикале искрење.
Во населбата Капиштец, на главната сообраќајница кај АМСМ, паднало големо дрво и целосно ја блокирало улицата. Полициски екипи и комунални служби веднаш излегле на терен за расчистување, со цел нормализација на сообраќајот.
Делови од Волково останале без електрична енергија, а според граѓаните, половина од населбата е без струја. Исто така, во Карпош и Капиштец ветерот урнал дрвја, а на булевар „Партизански одреди“ се урнал лимениот покрив од една зграда спроти бензинската пумпа „Окта“.
Иако засега нема информации за повредени лица, ситуацијата е крајно ризична. Граѓаните преку социјалните мрежи апелираат на внимателност и препорачуваат да се избегнува движење во близина на високи дрвја и електрични столбови.
Според Управата за хидрометеоролошки работи, нестабилно време со силен ветер, дожд, грмежи и суградица го зафати западниот и централниот дел од државата, а најголем удар трпи токму главниот град.
Скопје вечерва живее вистински хаос, додека службите се борат со последиците од невремето што направи огромна штета.
