Македонија испишува нова олимписка историја! Македонскиот олимписки комитет официјално го претстави националниот тим кој ќе настапи на Зимските олимписки игри Милано–Кортина (6–22 февруари), а за прв пат досега нашата земја ќе има четворица спортисти – сите со исполнета А-норма.
Овој рекорден настап е резултат на долги години напорна работа, екстремни подготовки и борба за место меѓу светската елита. Македонија ќе ја претставуваат:
- Јана Атанасовска, најмладата во тимот и рекордерка во алпско скијање
- Виктор Петков, кој ќе се натпреварува во слалом и велеслалом
- Ставре Јада, најискусниот олимписки борец, на своите трети Игри
- Ана Цветановска, која по Пекинг повторно ќе настапи во нордиските дисциплини
Спортистите порачаа дека зад оваа норма стојат илјадници километри тренинг и дека во Италија ќе дадат сè од себе – за секунда, за резултат и за гордост на нацијата.
Претседателот на МОК, Даниел Димевски, истакна дека ова е доказ дека новиот олимписки систем функционира: „Иако сме мала земја, по квалитет сме посилни од целиот регион. Обезбедивме врвни услови, нова опрема и целосна поддршка за да блеснеме на големата сцена“, порача Димевски.
Македонските навивачи ќе можат да ги следат настапите на МРТ:
- Нордиски дисциплини: 10, 12 и 13 февруари
- Алпски дисциплини: 14, 15 и 18 февруари
