Судот одреди триесетдневен притвор за осум лица поврзани со големата истрага за финансиски криминал во Управата за јавни приходи, со која, според надлежните, државниот буџет бил оштетен за околу 4,8 милиони евра. Одлуката е донесена по завршениот распит и разгледување на доказите, при што судот утврдил опасност од бегство, влијание врз сведоци и можност делото да биде повторено.
Акцијата беше спроведена под раководство на Основното јавно обвинителство за гонење организиран криминал и корупција, со вклученост на истражители и поддршка од МВР. Во текот на претресите на 16 локации низ државата, биле пронајдени и одземени фиктивни документи, готовина, оружје и фалсификувани печати, а осомничените биле приведени.
Истражните органи соопштија дека предметот опфаќа вкупно 20 лица, кои преку организирана шема нанеле штета на државата од речиси 298 милиони денари. Според наводите, првоосомничениот – странски државјанин и сопственик на повеќе фирми – заедно со службеници од УЈП, уште од 2023 година организирал група за даночно затајување, измами и перење пари.
Со лажни даночни пријави, неосновано барање поврат на данок и злоупотреба на службената положба, биле извлечени десетици милиони денари, додека дел од средствата биле префрлани и подигнувани со цел прикривање на нивното потекло.
За останатите осомничени, обвинителството побара мерки на претпазливост, меѓу кои и забрана за вршење службени должности во УЈП.
