Регулаторната комисија за енергетика подготвува анализа на сегашниот модел на блок-тарифи и евтината тарифа за електрична енергија, а една од можностите е во иднина да се променат периодите во кои домаќинствата плаќаат пониска цена.
Претседателот на РКЕ, Ацо Ристов, посочува дека засега нема донесено конечна одлука. Комисијата ги очекува податоците и барањата од енергетските компании за следниот тригодишен регулиран период, по што ќе следува детална анализа.
Причината за преиспитувањето е променетата состојба на пазарот на електрична енергија. Сегашниот модел бил креиран во период кога струјата во текот на денот била поскапа, но зголеменото производство од фотоволтаичните централи ја менува оваа слика.
Според Ристов, во одредени периоди преку ден сега има големо производство од фотоволтаици и поевтина електрична енергија, додека навечер, кога соларното производство престанува, цената може да биде повисока.
Поради тоа, РКЕ ќе анализира дали евтината тарифа треба подобро да се усогласи со часовите во кои електричната енергија на пазарот е поевтина.
Како една од можностите се разгледува и проширување на евтината тарифа во одредени периоди за време на викендите. Образложението е дека тогаш индустриската потрошувачка е пониска, па во системот може да се појават поголеми количества расположлива електрична енергија.
Пред каква било одлука, РКЕ најавува анализа на потрошувачката по часови, денови и тарифни блокови. Потоа, според најавите, ќе следува и јавна дебата во која би биле вклучени релевантните институции, универзитетите и експертите од енергетскиот сектор.
Целта, како што посочува Ристов, е евентуалниот нов модел да им овозможи на граѓаните поголема корист од периодите кога струјата е поевтина на пазарот.
Засега, сепак, нема одлука дека евтината тарифа се менува, ниту е утврден нов распоред – станува збор за можни решенија што допрва ќе се анализираат.
