Општина Бутел влегува во една од најдинамичните фази на развој во својата историја. Во тек е реализација на низа капитални проекти кои имаат за цел значително подобрување на квалитетот на живот на граѓаните и целосна трансформација на урбаната слика на општината.
Во здравствениот и јавниот сектор се најавува изградба на нова поликлиника, со што жителите на Бутел ќе добијат подобар и подостапен пристап до здравствени услуги. Паралелно со тоа, предвидена е изградба на нов централен плоштад и нов дом на култура, кои треба да станат јадро на општествениот и културниот живот во општината.
Особен акцент се става и на спортот и рекреацијата. Планирани се нови спортски центри кои ќе овозможат квалитетни услови за младите, спортистите и сите граѓани кои водат активен начин на живот. Истовремено, интензивно се работи на изградба и реконструкција на улици, како и на нови водоводни и атмосферски мрежи, со што се решаваат долгогодишни инфраструктурни проблеми.
Во делот на предучилишното образование, во наредниот период се очекува отворање на две нови детски градинки, што ќе значи директна поддршка за младите семејства и намалување на листите на чекање.
Во соработка со Скопје, започнува изградба на два нови кружни текови, како и целосна реконструкција на улицата Радишанска, проект од големо значење за подобрување на сообраќајната безбедност и проточноста.
Со овие проекти, Бутел чекор по чекор ја пишува својата нова развојна приказна и се позиционира како една од најперспективните и најуредени општини во Македонија.
