Денес, Православната црква и верниците го слават празникот посветен на Свети Јован Златоуст, архиепископ на Цариград, голем светец, реформатор и еден од најпознатите проповедници во историјата на Црквата. Тој е еден од трите свети архиереи кој го добил прекарот „Златоуст“ поради своите извонредни реторички способности.
Роден е во Антиохија во 354 година, од татко војвода и мајка Антуса. Изучувајќи грчка филозофија, се откажал од незнабоштвото и ја прифатил христијанската вера како единствена вистина. Крштението го примил од патријархот Мелетиј, а подоцна и неговите родители биле крстени. По смртта на родителите, се замонашил и се посветил на строг духовен подвиг.
Свети Јован Златоуст е познат по своите дела, особено книгата „За свештенството“ и неговите беседи, преку кои ја проповедал личната и социјалната етика. Тој се залагал за помагање на сиромашните, ја осудувал неправдата и злоупотребата на властта, и ги критикувал богатите кои ја експлоатирале сиромашната популација.
Како патријарх на Цариград, управувал со Црквата со голема мудрост, испраќал мисионери, сотрел симонијата, ја проширил милосрдната дејност, ги посрамил еретиците и напишал свој чин на Светата Литургија. Народот го почитувал, но завидливците и царицата Евдоксија двапати го испратиле во прогонство. Својот живот го завршил на 14 септември 407 година, а моштите се чуваат во манастирот Ватопед на Света Гора и во Цариград.
Свети Јован Златоуст е симбол на љубовта кон ближните и сиромашните, како и посветеност на Светото писмо и литургијата.
Народни верувања за денешниот ден:Се верува дека на овој ден вреди да се земе книга и да се прочита барем дел од неа. Во некои краишта, постои верување дека жените не треба да држат волна, конец или игли во рацете, како дел од традиционалните обичаи за почит кон празникот.
