Попладнево силно невреме проследено со силен ветер и високи бранови предизвика прекин на 38. Охридски пливачки маратон. Трката беше прекината во 14 часот и 30 минути, во близина на хотел „Гранит“.
Судијата Марјан Бошалевски изјави дека условите станале премногу опасни за натпреварувачите. „Големото невреме проследено со високи бранови предизвика проблеми кај пливачите. Констатирана е моменталната состојба на маратонците и по сублимирање на податоците ќе биде прогласен победникот. Согласно правилата, доколку временските услови не дозволуваат по поминати две третини од патеката, трката се прекинува“, појасни тој.
Во моментот на прекинот, пливачите буквално се бореа со брановите кај хотел „Гранит“. Натпреварот започна утрово во 10 часот од Свети Наум, а на Охридското пристаниште се очекуваше да заврши околу 16 часот.
На 25-километарската патека настапија 16 маратонци – десет во машка и шест во женска конкуренција. Македонија ја претставуваа четворица пливачи во машка конкуренција: Александар Илиевски, Леонид Мишевски, Петар Цеков и Лазар Поп Трајков. Меѓу учесниците беа и врвни пливачи од Аргентина, Италија, Полска, Португалија и Србија.
Во женска конкуренција настапија Елена Лионело од Италија, Росана Гошева од Македонија, Алисја Гедриш од Полска, Милица Љубисављевиќ од Србија, како и Аргентинките Ерика Абигал Јенсен и Мајте Ајлен Пука. Турската пливачка Еда Сајин мораше да го откаже настапот поради повреда.
Организатор на маратонот е пливачкиот клуб „Охридски бранови 2008“, а настанот се одржува под покровителство на претседателката Гордана Сиљановска-Давкова, Министерството за спорт, Пливачката асоцијација на Македонија и Општина Охрид.
Наградниот фонд за годинашното издание изнесува 15.000 евра. И покрај несреќниот прекин, Охридскиот пливачки маратон и оваа година останува дел од големиот „Ohrid Water Festival“.
