Агенцијата за храна и ветеринарство (АХВ) упати апел до граѓаните во региони зафатени од надојдена вода да внимаваат на безбедноста на прехранбените производи, водата за пиење и здравјето на добитокот.
Граѓаните се советуваат:
- Да се следат информациите за временските услови, состојбата на реките и исправноста на водоснабдувањето.
- Водата од индивидуални водоводни објекти која е заматена да не се користи за пиење или готвење додека не се добие лабораториска потврда за нејзината безбедност.
- Да се одржува хигиена на рацете, особено по контакт со поплавена вода или предмети.
- Готовата храна да се заштити од контакт со поплавена вода или отпадни води.
- Храната изложена на поплавена вода или сместена во поплавени фрижидери, замрзнувачи и визби да се отстрани.
- Јадењето да се приготвува со безбедна вода и да се термички обработи над 70°C.
- Овошјето и зеленчукот да се мијат, лупат и повторно термички обработуваат пред консумација.
- За мали деца се препорачува индустриски подготвена храна.
Во однос на добитокот:
- Сопствениците треба да обезбедат храна, вода и прибежиште на сигурна локација.
- Ако е потребно да се напушти местото, животните треба да се префрлат на безбедно место.
- Врзаните животни во штала треба да се одврзат и да се дислоцираат на повисоко место.
- Храната и водата за добитокот треба да се сместат на суво и безбедно место.
- Сопствениците треба да бидат во контакт со надлежниот ветеринар за насоки и евентуална медицинска грижа.
АХВ нагласува дека правилната заштита на храна, вода и животни е клучна за здравјето и благосостојбата на семејствата погодени од поплавите.
