ВМРО-ДПМНЕ денеска изјави дека македонското правосудство, со само 2% доверба од граѓаните, не покажува посветеност да ја зголеми својата ефикасност, а со тоа дополнително ја поткопува веќе ниската кредибилност.
„Наместо да работат во интерес на граѓаните и да обезбедат доследно спроведување на правдата, делови од судството и обвинителството бараат двојно зголемување на платите“, истакнуваат од партијата.
Според нив, македонските судии и обвинители веќе се меѓу најплатените во регионот и Европа, со примања од 2,3 до 3,2 просечни плати, односно над 100.000 до 144.000 денари (1.700 до 2.360 евра). Претседателите на суд земаат околу 180.000 денари (3.000 евра).
ВМРО-ДПМНЕ прави споредба со соседните и европските земји:
- Во Србија, судиите и обвинителите земаат околу 120.000 денари (2.000 евра), а довербата на граѓаните е 20%.
- Во Хрватска, довербата е исто 20%, а платите на правосудните органи се околу 3.350 евра.
- Во Словенија, со доверба од 41%, платите се движат од 107.000 денари (1.738 евра) до над 4.000 евра за врвните позиции.
- Во Германија, довербата е 58%, а платите на судиите околу 3.300 евра (200.000 денари).
„Сега, судиите и обвинителите во Македонија бараат двојно зголемување, што би значело плати од 160.000 денари за судија и 360.000 денари за претседател на суд – многу над европските стандарди, а со доверба од само 2%“, нагласуваат од ВМРО-ДПМНЕ.
Партијата повикува на разумност и апелира правосудните органи да се фокусираат на работа и да покажат резултати кои ќе ги почувствуваат граѓаните.
