Сериозен инцидент во кој жртва била малолетничка е пријавен во скопската населба Чаир, откако група малолетници со закана со остар предмет одзеле пари од 16-годишно девојче и продолжиле да ѝ се закануваат.
Според информациите од Министерството за внатрешни работи, случајот бил пријавен на 17 мај 2026 година околу 19:30 часот во СВР Скопје од страна на 40-годишниот Ф.М. од Скопје, татко на девојчето.
Тој во пријавата навел дека инцидентот се случил на 7 мај околу 08:00 часот на подрачјето на Чаир, кога неколку малолетници ѝ се заканиле на неговата 16-годишна ќерка со остар предмет и ѝ одзеле пари.
Според пријавеното, ситуацијата не завршила само со тоа. Малолетниците, наводно, ѝ упатиле и дополнителни закани, барајќи од девојчето повторно да им носи пари и во наредните денови.
Од полицијата информираат дека се преземаат мерки за целосно расчистување на случајот, идентификување на инволвираните лица и утврдување на сите околности поврзани со настанот.
