Претседателката Гордана Сиљановска Давкова денеска учествуваше на Дипломатскиот хуманитарен базар, кој се одржа под покровителство на амбасадорот на Република Австрија, Мартин Памер, по повод Светскиот ден на детето. На настанот, на претседателката ѝ беше врачена благодарница за нејзиниот придонес.
„Годинава, во раскошот на меѓународната разноликост, Дипломатскиот добротворен базар повторно беше место каде што солидарноста ги поврзува културите. Уживав во културното шаренило, во масичките преполни со уметнички предмети по кои се препознаваат државите, во уникатните производи, вкусната храна, но најмногу во насмеаните детски лица, веселите луѓе и убавата музика. Благодарницата за мојот скромен придонес ме потсети дека суштината на хуманоста најсилно се изразува кога е упатена кон децата. Импресивно е кога празничната магија добива длабока човечка димензија“, напиша Сиљановска Давкова на својот Фејсбук профил.
Настанот привлече голем број посетители и имаше за цел собирање средства за подобрување на хигиенските услови во две основни училишта, за сите ученици, вклучително и децата со попреченост. Амбасадорот Мартин Памер истакна дека иницијативата е од исклучителна важност за заедницата и дека дипломатската заедница заеднички придонесува кон создавање подобри и подостојни услови за развој на децата.
Голем број амбасади поставија свои штандови, каде посетителите можеа да пробаат традиционални јадења од различни земји, како и да купат автентични подароци, ракотворби, приврзоци и други уникатни предмети. Меѓу учесниците беа амбасадите на Австрија, Германија, Италија, Шпанија, Турција, Јапонија, Кина, како и Делегацијата на Европската Унија и Институтот „Конфучие“.
