Ива Михајлова, која се лекува во Бугарија по повредите здобиени во сообраќајната несреќа во Кочани, изјави дека сè уште не знае колку долго ќе трае нејзиното закрепнување. Доколку лекарите во Бугарија не успеат да ги третираат здравствените проблеми со кои се соочува, таа најверојатно ќе биде упатена на лекување во Израел.
Во изјава за Бугарската национална телевизија, Михајлова побарала да учествува преку видеоконференција на денешното судско рочиште во Кочани, каде што продолжува постапката што се води против неа. На рочиштето се очекува да бидат разгледани два вештачки наоди, за кои таа тврди дека ги потврдуваат нејзините аргументи и ја докажуваат нејзината невиност во врска со несреќата во која едно лице го загуби животот, а неколку други беа повредени.
Михајлова се наоѓа во Бугарија од 12 октомври, каде што заминала за да побара медицинска помош за повредите. Според објавените информации, таа ја напуштила Северна Македонија без дозвола од надлежните власти.
Таа објаснила дека лекувањето го започнала пред три или четири недели, по враќањето во Бугарија, додека со рехабилитацијата почнала дури неодамна. Поради тоа, засега не може да процени колку време ќе биде потребно за да заврши медицинскиот третман.
„Моето лекување започна пред три или четири недели, по враќањето во Бугарија, заедно со рехабилитацијата, која ја почнав дури неодамна. Затоа, во моментов не можеме да кажеме колку долго ќе продолжи“, изјавила Михајлова.
Таа тврди дека повредите оставиле трајни последици кои значително ѝ го отежнуваат секојдневното функционирање. Во моментов, како што посочила, заедно со лекарите во Бугарија работат на ублажување на последиците. Михајлова смета дека нејзината состојба дополнително се влошила поради тоа што, според неа, со месеци не ѝ била овозможена потребната рехабилитација во Кочани.
„За жал, останав со трајни последици што ми го отежнуваат секојдневниот живот, а моментално работиме со лекарите овде за да ги санираме. Ова е токму поради недостатокот на рехабилитација – нешто што со месеци ми беше ускратено во Кочани“, изјавила таа.
За време на интервјуто, Михајлова седела со нозете споени, а објаснила дека не може да ги прекрсти поради непријатностите што ги чувствува како последица на повредата на ’рбетот.
Таа навела и дека лекарите ѝ соопштиле оти одредени здравствени проблеми, меѓу кои и вкочанетоста во екстремитетите, можеби нема да можат целосно да се отстранат дури ни со медицинска интервенција.
„Ми рекоа дека дури и со медицинска интервенција, вкочанетоста во екстремитетите – заедно со некои други проблеми – не може да се реши. Сепак, засега нема ништо критично. Ако лекарите овде не можат да се справат со тоа, ќе бидам упатена во Израел“, рекла Михајлова.
Тврди дека била постојано следена во Македонија
Во интервјуто, Михајлова се осврнала и на периодот што го поминала во Северна Македонија, тврдејќи дека во последните месеци била под постојан надзор.
Според нејзините тврдења, пред нејзиниот дом редовно имало полициско присуство, а биле вршени и претреси и следење со помош на дронови.
„Секогаш кога излегувам, некој ме следи – дали е тоа полицијата или разузнавачките служби, не е важно. Едноставно, секогаш има некој“, изјавила таа, без да објасни како успеала да ја напушти земјата и покрај тоа што, според нејзините зборови, била под постојан надзор.
Михајлова смета дека станувало збор за психолошко вознемирување и притисок врз неа, со цел, како што тврди, да биде доведена во состојба да се откаже.
Таа посочила дека особено ја погодило тоа што, според нејзините наводи, надлежни лица повеќепати незаконски влегувале во нејзиниот дом. Михајлова тврди дека заедно со својот тим поднела барање до телото за внатрешна контрола за да добие објаснување зошто и како се случувале тие влегувања, но одговор никогаш не добиле.
Како што нагласила, убедена е дека наводното вознемирување започнало откако јавно го истакнала својот бугарски идентитет.
Обвинувања и за медиумите во Македонија
Михајлова во интервјуто упатила критики и кон медиумите во Северна Македонија, тврдејќи дека со објавените информации придонеле албанското население да се сврти против неа и против Бугарија.
Таа смета дека во јавноста биле пласирани голем број невистини, а посебно ги посочила и изјавите на високи функционери, за кои тврди дека ја преминале секоја граница.
„Напишани се толку многу лаги, а високи функционери изнесоа толку многу невистини – тоа ги надмина сите граници“, изјавила Михајлова.
Бара да се вклучи онлајн на судењето во Кочани
Во врска со судската постапка што се води против неа во Кочани, Михајлова изјавила дека сè уште не знае дали ќе ѝ биде дозволено да учествува на рочиштата од Бугарија.
Постапката во моментов продолжува во нејзино отсуство, а нејзиниот адвокат веќе поднел барање таа да може да се вклучи преку интернет, односно со видеоконференциска врска.
„Мојот адвокат поднесе барање да учествувам онлајн од овде. Сега чекаме да видиме дали обвинителството и судот ќе го прифатат нашето барање да се вклучам во постапката од далечина“, објаснила таа.
На денешното рочиште се очекува да бидат разгледани два вештачки наоди, изготвени по барање на нејзините адвокати во Северна Македонија. Според информациите, тие не биле подготвени од вештаци назначени од обвинителството во Кочани.
Михајлова тврди дека детално ги проучила двата извештаи повеќе од сто пати и дека во нив се содржани докази кои, според неа, ја потврдуваат нејзината невиност. Таа посебно ги споменала трагите што, како што тврди, ги оставило другото возило во нејзината сообраќајна лента.
„Досега ги имам прочитано двата наоди повеќе од сто пати; и двата укажуваат на мојата невиност, како и на трагите што ги оставило другото возило во мојата лента. Сè е јасно видливо. Затоа, се надевам дека вистината на крајот ќе излезе на виделина“, изјавила Михајлова.
Таа очекува судот да ги разгледа доставените наоди, додека останува неизвесно дали ќе ѝ биде одобрено барањето за учество на судењето преку видеоконференција.
