Комитетот за надворешни работи на Европскиот парламент утре ќе гласа за Извештајот за напредокот на Македонија, подготвен од известувачот Томас Вајц. Документот експлицитно го признава македонскиот јазик и идентитет, што предизвика силна реакција кај бугарските европратеници, поради што гласањето беше одложено на 4 јуни.
„Овој извештај не решава билатерални прашања, туку се фокусира на европските вредности, владеење на правото и правата на малцинствата“, изјави Вајц, барајќи одложување за да се надминат политичките притисоци.
Во документот се повикува на забрзување на пристапните преговори со Македонија и спроведување на уставните измени. Се нагласува посветеноста на земјата кон евроинтеграцијата и се повикува ЕУ да го зачува кредибилитетот на процесот.
Премиерот Мицкоски изјави дека очекува јасна и силна поддршка за македонскиот идентитет. Тој додаде дека заедно со министерот за надворешни работи се спротивставиле на обидите за менување на текстот под влијание на бугарските европратеници.
Седницата е закажана за утре во 9 часот, а извештајот е прва точка на дневниот ред. Очекувањата се дека ќе биде усвоен со поддршка од мнозинството европратеници.
