Студентските организации бараат зголемување на субвенцијата за студентски оброк, која во моментов изнесува 140 денари дневно. Министерката за образование и наука Весна Јаневска најави дека барањето ќе биде разгледано, но конечната одлука ќе зависи од расположливите средства во буџетот.
Јаневска истакна дека Министерството внимателно ќе ги разгледа студентските иницијативи и ќе направи финансиска анализа пред да донесе одлука.
„Со внимание ќе ги разгледаме иницијативите на студентите, како и сите досега, и по тоа внимателно разгледување, ќе одговориме во рамките на нашите можности. Ќе треба да се направи анализата и потоа ќе им одговориме и на студентите и јавно“, изјави Јаневска.
Студентите најавуваат и иницијатива за субвенционирање на меѓуградскиот превоз за оние кои секојдневно патуваат на факултет, посочувајќи ги зголемените цени на билетите. Министерката рече дека и ова барање ќе биде разгледано откако официјално ќе пристигне во Министерството, земајќи ги предвид буџетските можности и надлежностите на институцијата.
Јаневска информираше и дека постапката по дополнителниот оглас за образовни асистенти е завршена, а изборот е при крај. Според неа, останува да се обезбедат асистенти за уште мал број ученици, а сите деца на кои им е потребна ваква поддршка треба да ја добијат.
