HBO го објави првиот трејлер за високобуџетната телевизиска адаптација на бестселерот на Џ.К. Роулинг за Хари Потер, а првата сезона ќе има премиера во декември оваа година.
По долг процес на кастинг и продукција обвиткана во тајност, Хари, Рон и Хермиона конечно се враќаат во Хогвортс.
Првата сезона е базирана на првата од седумте книги на Роулинг и ги претставува трите главни ликови: Хари (Доминик Меклафлин), Хермиона Гренџер (Арабела Стентон) и Рон Визли (Алистер Стаут), кои се запознаваат како единаесетгодишници во возот кон училиште за волшебници.
Двоминутното видео, прикажано првпат на прес-конференција во Лондон, алудира на неколку култни сцени од книгата и филмот од 2001 година, режиран од Крис Колумбус, вклучувајќи ја средбата на Хари со полуџинот Хагрид (Ник Фрост), пробувањето на Сортирачкиот шешир и неговиот прв натпревар во квидич како трагач по Грифиндор.
Меклафлин, Стентон и Стаут беа избрани по обемно пребарување и јавен кастинг за британски деца на возраст од девет до 11 години, кои ќе ги играат централните ликови во текот на повеќе сезони. Возрасните улоги ги толкуваат Џон Литгоу како директорот Албус Дамблдор, Џенет МекТир како професорката Минерва Мекгонагал и Папа Есиеду како професорот Северус Снејп.
Серијата со повеќе сезони, за која се очекува да навлезе подлабоко во книгите отколку филмската серија од осум дела, е „најголемиот стриминг настан во историјата на HBO Max и веројатно во светот на стримингот“, според ЏБ Перет, извршен директор на Warner Bros. Discovery.
Даниел Редклиф, ѕвездата на оригиналната филмска серија, рече дека Доминик Меклафлин веројатно е подобар избор за улогата на Хари отколку што бил тој како 12-годишник.
Адаптацијата предизвика внимание и поради изборот на Есиеду, црномурест актер, за улогата на Снејп, кој го играше белоликиот Алан Рикман во оригиналните филмови. Есиеду откри дека добил смртни закани заради улогата и ја користи омразата како „гориво“ за својата интерпретација.
Контроверзии предизвикаа и јавните ставови на Роулинг против трансродовите лица, но таа е извршен продуцент на серијата. Литгоу рече дека е воодушевен од нејзиното вклучување, бидејќи книгите се „јасно на страната на доброто, против омразата и нетолеранцијата“.
Главниот директор за содржини на HBO, Кејси Блојс, го бранеше вклучувањето на Роулинг, истакнувајќи дека нејзините лични ставови се одвоени од содржината на серијата.
Според трејлерот, „Хари Потер и каменот на мудроста“ ќе има премиера на HBO Max на 25 декември, неколку месеци порано од претходно планираниот датум во 2027 година, речиси 30 години по објавувањето на првата книга.
