Денес се слави празникот на Тихвинската икона на Пресвета Богородица – чудотворна икона која, според црковното предание, била насликана лично од светиот апостол Лука.
Во 5 век, иконата била пренесена од Светата Земја во Цариград и сместена во прочуениот Влахерински храм. Но во 1383 година, 70 години пред падот на Византија, таа мистериозно исчезнала. Она што следело го оставило целиот христијански свет во неверување – иконата се појавила во воздухот, обвиена со силна светлина, над Ладошкото Езеро во Русија.
Светиот лик потоа слетал близу градот Тихвин, каде што била изградена црква, а потоа и манастир. Иконата станала позната како Тихвинска, а местото – свето тло за илјадници верници.
Во текот на вековите, оваа икона се прочула по безброј чуда, особено поради нејзината моќ да лекува болни и да донесува утеха на оние што се во мака. И денес верниците од целиот свет и пристапуваат со вера, надевајќи се на исцеление и духовен мир.
Случајност или божествена интервенција? За многумина, Тихвинската икона останува доказ за живото присуство на Богородица меѓу луѓето.
