Летните горештини можат да претворат една омилена детска играчка во сериозна опасност. Експертите предупредуваат дека популарните меки антистрес играчки познати како „сквиши“ не треба да се оставаат во автомобили изложени на високи температури, бидејќи постои ризик од пукање и истекување на жешкиот гел кој се наоѓа во нив.
Предупредувањето доаѓа по неколку случаи во Соединетите Американски Држави, каде што деца се здобиле со изгореници откако играчките оставени во возила се оштетиле поради екстремната топлина.
Според експертите, кога автомобилот стои на сонце, температурата во неговата внатрешност може за кратко време да достигне над 50 степени Целзиусови. Таквите услови можат да предизвикаат гелот во играчката да се загрее, да се прошири и на крајот да доведе до пукање на материјалот.
Еден од најпознатите случаи е оној на 13-годишно девојче од Западна Вирџинија, кое завршило во болница откако играчка оставена во автомобил пукнала и го испрскала со жешка содржина.
Нејзината мајка раскажала дека гелот се залепил за кожата и било потребно медицинско третирање за безбедно да биде отстранет.
– Содржината беше како врела карамела која се стврднала на кожата – изјавила таа.
Лекарите предупредиле дека ваквите материи не треба да се отстрануваат со сила, бидејќи тоа може дополнително да ја оштети кожата.
Сличен случај бил пријавен и во Ново Мексико, каде што уште едно младо лице завршило со повреди поради пукање на ваква играчка.
Опасен тренд што кружи на интернет
Дополнителен ризик претставуваат и предизвиците на социјалните мрежи, каде што корисници ги загреваат овие играчки во микробранова печка за да станат помеки.
Иако производителите јасно наведуваат дека играчките не смеат да се загреваат, некои деца ги следат ваквите трендови, што во минатото довело до несреќи и повреди.
Експертите предупредуваат дека проблемот не е само во температурата, туку и во составот на гелот. Кај одредени производи се утврдени супстанции кои можат да предизвикаат иритација на кожата, а во некои ситуации и хемиски реакции.
Покрај ризикот за здравјето, истечениот гел може да направи голема штета и во автомобилот, бидејќи се лепи за седишта, тапацири и други површини, а неговото чистење често бара дополнителни трошоци.
Експертите советуваат родителите во летниот период внимателно да проверуваат што останува во возилото пред да го остават паркирано на сонце.
Освен „сквиши“ играчките, опасност во прегреан автомобил можат да претставуваат и други предмети чувствителни на високи температури, како спрејови под притисок, батерии, лекови и пластични шишиња.
Најважната порака е едноставна – играчка што изгледа безопасно во детска рака, во екстремни услови може да стане сериозен ризик.
