Иднината на познатиот шпански автомобилски бренд „Сеат“ повторно е доведена во прашање, откако се појавија информации дека германскиот автомобилски гигант „Фолксваген“ разгледува можност за негово постепено згаснување до крајот на деценијата.
Сепак, конечна одлука за затворање на брендот засега не е донесена, потврди извршниот директор на „Сеат“ и „Купра“, Маркус Хаупт.
Во разговор за „Аутокар“ на Саемот за автомобили во Париз, Хаупт признал дека згаснувањето на „Сеат“ е едно од можните сценарија, но нагласил дека компанијата разгледува и други опции.
Според него, иднината на брендот во голема мера ќе зависи од европските регулативи за емисиите на јаглерод диоксид, кои од 2030 година ќе станат построги, како и од побарувачката на автомобилскиот пазар.
И покрај неизвесноста, во „Сеат“ и понатаму се инвестира, а за 2027 година се планирани нови модели со благ хибриден погон.
Големо влијание врз стратегијата на „Фолксваген“ имаат и продажните резултати.
Во 2025 година „Купра“ продала 328.800 автомобили, што претставува раст од 32,5 проценти, додека „Сеат“ забележал 257.400 испорачани возила, односно пад од 17 проценти.
Овие бројки покажуваат дека „Купра“ станува сè позначаен бренд во рамките на германската автомобилска групација.
Дополнителен притисок врз „Фолксваген“ создаваат силната конкуренција од кинеските производители, американските царини и потребата од намалување на трошоците.
Во третото тримесечје од 2026 година, заедничката продажба на „Сеат“ и „Купра“ се намалила за 2,3 проценти, на 133.700 возила.
Иако „Купра“ бележи поголем раст, „Сеат“ и понатаму има своја публика, особено меѓу купувачите кои бараат практични автомобили по попристапни цени.
Дали „Сеат“ навистина ќе исчезне од автомобилскиот пазар или ќе продолжи со нова стратегија, ќе зависи од одлуките што „Фолксваген“ ќе ги донесе во наредните години.
