Поретко перење, ладна вода и правилна нега се клучни за подолг век, подобар изглед и помало оштетување на ткаенината.
Ако фармерките ги перете по секое носење, експертите предупредуваат дека тоа најчесто е непотребно и може да ѝ наштети на ткаенината. Честото перење ја забрзува загубата на бојата, ја нарушува формата и ја прави ткаенината покрута со текот на времето.
Основни правила за нега
Едно од најважните правила е фармерките секогаш да се перат свртени наопаку. Така се намалува триењето на надворешната страна, се штити бојата и се отстрануваат насобраните бактерии од внатрешноста на ткаенината.
Колку носења без перење?
Lindsey Boyd, коосновачка на брендот The Laundress, препорачува перење во ладна вода со квалитетен детергент. Според неа, честото перење е една од главните причини поради кои фармерките ја губат формата и стануваат нееластични. Колку долго може да се носат без перење зависи од условите: дали се валкаат, дали впиваат мириси и колку интензивно се носат.
Нејзината колешка, Gwen Whiting, објаснува дека тексасот е значително подебела и поиздржлива ткаенина од памучна маица. Затоа, фармерките можат да се носат повеќепати без перење, а нејзината препорака е перење по околу 10 носења или кога ќе се појави непријатен мирис. Помеѓу перењата, мирисите може привремено да се намалат со освежувач за облека.
Кога навистина мора да се перат?
Модната стилистка од Њујорк, Lana Blank, смета дека фармерките треба да се перат само кога реално ќе се почувствува мирис. Таа нагласува дека микробите што се собираат при нормално носење, како мртви клетки од кожа и природни масла, генерално се безопасни и не бараат итна реакција.
Од друга страна, блогерката Gladys K. Connelly препорачува перење на секои шест недели, со напомена дека секој човек најдобро го познава сопственото тело и треба да го приспособи ритамот на перење според личните навики и начин на живот.
Златното правило: без топлина
Сите експерти се согласуваат околу едно правило без исклучок: избегнувајте врела вода и сушара. Топлината сериозно го оштетува тексасот, особено фармерките со еластични влакна. Перењето во ладна вода и сушењето на воздух се најдобриот начин да се зачува бојата, формата и трајноста на фармерките.
