Хрватска повеќе не се наоѓа меѓу првите пет европски земји според квалитетот на водата за капење, покажува најновиот извештај на Европската агенција за животна средина за сезоната 2025 година. Земјата сега е рангирана на 12. место, додека според квалитетот на морската вода се наоѓа на 14. позиција.
Иако ваквиот пад на прв поглед изгледа загрижувачки, експертите посочуваат дека не станува збор за нагло влошување на квалитетот на морето, туку најмногу за промени во методологијата и начинот на статистичка обработка.
Во извештајот се наведува дека од вкупно 1.039 регистрирани капалишта во Хрватска, 896 добиле оценка „одлично“, што претставува 86,2 проценти. Сепак, дури 113 локации не биле класифицирани бидејќи за нив немало доволно податоци од последните четири години, а токму тоа значително го намалило вкупниот процент.
Според хрватските експерти, доколку се земат предвид само капалиштата кои ги исполнуваат сите услови за класификација, дури 96,8 проценти од нив имаат оценка „одлично“, што ја задржува Хрватска меѓу земјите со најквалитетна морска вода во Европа.
Најголем проблем за вкупното рангирање не е морето, туку копнените капалишта – реките и езерата. Во 2025 година Хрватска имала 42 вакви локации, од кои само 23 добиле највисока оценка, поради што земјата е рангирана дури на 22. место во оваа категорија.
Европската агенција за животна средина нагласува дека на ниво на Европската Унија 85 проценти од сите капалишта имаат оценка „одлично“, а 96 проценти ги исполнуваат минималните стандарди за безбедно капење.
Експертите потсетуваат дека оценката „одлична вода за капење“ се однесува исклучиво на микробиолошката исправност на водата, односно присуството на бактерии кои укажуваат на можно фекално загадување, а не претставува целосна проценка на состојбата на морскиот екосистем.
