Финска го доби својот најдолг мост – Круунувуори, долг 1,19 километри, кој го поврзува источниот островски дел на Хелсинки со центарот на градот. Она што го прави посебен е фактот што по него нема да смеат да се движат автомобили и мотоцикли – мостот е наменет исклучиво за пешаци, велосипедисти и трамваи.
Проектот предизвикал поделени мислења во јавноста, главно поради неговата висока цена од околу 320 милиони евра. Критичарите сметаат дека инвестицијата е преголема за мост кој не го користи класичниот сообраќај, предлагајќи алтернативи како подобрување на постојната инфраструктура или фериботски превоз.
Од друга страна, градските власти го гледаат мостот како дел од поширока стратегија за развој на одржлив транспорт. Хелсинки веќе располага со околу 1.300 километри велосипедски патеки и планира дополнително проширување на мрежата во наредните години.
Иако условите за велосипедизам во градот се предизвикувачки поради студените зими и силните ветрови, локалните власти продолжуваат да инвестираат во алтернативни форми на транспорт. Во план се и нови трамвајски линии, како и ограничување на автомобилскиот сообраќај во делови од центарот.
И покрај критиките, дел од граѓаните веќе го поздравуваат новиот мост, оценувајќи го како модерен и корисен чекор кон поодржлив и поуреден градски сообраќај.
