Вештачката интелигенција сè почесто учествува во процесите на регрутација и селекција на кандидати, но ново истражување покажува дека нејзината употреба може да создаде дополнителни предизвици за постарите работници.
Научен тим од Универзитетот во Мелбурн анализирал како системите базирани на вештачка интелигенција реагираат на профили на кандидати од различни возрасни групи. Резултатите покажале дека во одредени сценарија алгоритмите почесто препорачувале помлади лица за работни позиции кои бараат креативност, иновативност и динамичност.
Во тестирањата, кандидатите помеѓу 21 и 45 години добивале значително повеќе препораки за различни професии, додека лицата над 45 години биле многу поретко избирани или воопшто не биле вклучени во предлозите за одредени работни места.
Истражувачите предупредуваат дека ваквите модели можат несвесно да ги репродуцираат постоечките предрасуди од реалниот свет. Дополнително, забележано е дека постарите кандидати почесто биле поврзувани со ограничен број професии или работни ангажмани со помала одговорност и пониски примања.
Според авторите на студијата, проблемот не е во самата технологија, туку во податоците врз кои таа е обучувана. Доколку тие содржат историски предрасуди, алгоритмите можат да ги пренесат и во процесите на вработување.
Поради тоа, експертите повикуваат на построга контрола и јасни правила за употребата на вештачка интелигенција во човечките ресурси, со цел сите кандидати да добијат еднаква можност без оглед на нивната возраст, искуство или професионална позадина.
