Мало село во Шпанија нуди ретка можност за нов почеток – бесплатно сместување и обезбедена работа за оние што сакаат да го заменат градскиот живот со мирна рурална средина. Станува збор за Аренилјас, кое се наоѓа на околу два часа од Мадрид.
Ова живописно место, со камени улички и природа исполнета со полиња од лаванда и зелени пејзажи, се соочува со намалување на населението. Во обид да привлечат нови жители, локалните власти и мештаните реновирале неколку објекти и ги претвориле во модерни станови подготвени за вселување.
Во селото моментално живеат околу 40 луѓе, а новите жители ќе можат да се вселат без да плаќаат кирија. Тие ќе покриваат само основни трошоци како вода и гас, додека струјата е значително поевтина благодарение на соларните панели.
Покрај сместувањето, обезбедена е и работа, особено во градежниот сектор, каде што има потреба од работна сила за одржување и развој на селото.
Овој проект најмногу е насочен кон семејства, за кои се обезбедени дополнителни бенефиции, како организиран превоз за децата до училиште.
Заинтересираните кандидати треба да аплицираат директно до општината, со кратко претставување и информации за своите вештини. Сепак, важно е да се има предвид дека приоритет имаат лица со право на работа во Шпанија.
Интересот е голем – во краток период пристигнале над 200 апликации, што покажува дека сè повеќе луѓе бараат поинаков, помирен начин на живот.
