Членови на кабинскиот персонал предупредуваат дека една од најчестите грешки што ја прават патниците е влегувањето боси во тоалетот на авионот.
Во поткаст на BBC со водителот Мартин Луис, стјуардеса која работи за една светска авиокомпанија објасни дека ова може да претставува здравствен ризик. Таа посочи дека течностите на подот во авионските тоалети не секогаш се вода, туку често можат да бидат урина, повраќаница или други телесни течности кои содржат бактерии, вируси и габи. Затоа патниците секогаш треба да носат обувки кога го користат тоалетот.
Освен тоа, членовите на екипажот предупредуваат и на уште една честа грешка – патување со пасош чиј рок на важност е пред истекување. За многу земји потребно е пасошот да важи најмалку шест месеци од денот на влезот, додека за повеќето земји од Европската Унија најчесто се бара да има важност најмалку три месеци по планираниот престој.
Тие потсетуваат и дека патничкото осигурување е исклучително важно, бидејќи може да покрие неочекувани трошоци доколку се случи здравствен или друг проблем за време на патувањето.
Исто така, советуваат патниците секогаш да носат основни лекови, како средства против болка, бидејќи кабинскиот персонал не секогаш смее да дава лекови без присуство на медицинско лице. Комплетот за прва помош во авионот не е замена за личната патна аптека, па затоа е најдобро секој патник однапред да се подготви.
