Министерот за култура, Зоран Љутков, денеска на археолошкиот локалитет Скупи, заедно со д-р Лукас Вертер од Римско-германската комисија, го потпиша Меморандумот за соработка со Германскиот археолошки институт – престижна меѓународна институција со долгогодишна традиција под надлежност на Федералното министерство за надворешни работи на Германија.
Оваа соработка отвора нови перспективи за македонските музеи и научни установи, кои ќе имаат можност за заеднички истражувања, размена на искуства и примена на најсовремени методологии. Љутков потенцираше дека археологијата претставува живо наследство и мост меѓу минатото, сегашноста и иднината, а ова партнерство не само што ќе го унапреди научното истражување, туку ќе го зајакне и културниот туризам, претворајќи ги археолошките локалитети во вистински амбасадори на македонската историја пред светот.
Дополнително, беше потпишан и договор меѓу Музејот на град Скопје и Римско-германската комисија – прв конкретен чекор кон реализација на оваа долгорочна и значајна соработка. Министерот изрази увереност дека ова е почеток на ново поглавје кое ќе донесе силни резултати и уште поголема меѓународна афирмација на македонското културно наследство.
