Вредноста на американскиот долар минатата недела забележа пад во однос на кошничката на најважните светски валути, под влијание на загриженоста на инвеститорите околу состојбите на американскиот пазар на обврзници и интервенциите на Министерството за финансии на САД.
Индексот на доларот, кој ја следи вредноста на американската валута во однос на шест главни валути, падна за 0,8 отсто и неделата ја заврши на 98,84 поени. Доларот ослабе и во однос на еврото, за 0,9 отсто, па еден долар се разменуваше за околу 1,1680 евра. Во однос на јапонскиот јен, американската валута падна за 0,2 отсто, на 158,95 јени за долар.
Надолниот тренд следуваше откако американското Министерство за финансии презеде мерки на пазарот на обврзници, по претходната интервенција на валутниот пазар поврзана со курсот на доларот и јенот. Во текот на неделата приносите на 30-годишните американски обврзници достигнаа највисоко ниво од 2007 година, а пораснаа и приносите на обврзниците со пократок рок на достасување.
Повисоките приноси ги зголемуваат трошоците за задолжување на американската држава, поради што Министерството за финансии најави дека ќе го удвои обемот на купување долгорочни обврзници. Мерката привремено го запре растот на приносите, но веќе следниот ден тие повторно почнаа да се зголемуваат. На движењето на приносите влијаат повеќе фактори, меѓу кои инфлацијата, загриженоста околу јавниот долг и очекувањата за идните каматни стапки.
И покрај тоа, инвеститорите сè уште очекуваат американската централна банка да не ги зголеми каматните стапки на септемврискиот состанок. Сепак, последните сигнали од Федералните резерви покажуваат дека дел од нивните претставници се сериозно загрижени за инфлацијата. Некои од нив сметаат дека би било потребно зголемување на каматните стапки доколку инфлацијата не продолжи да се движи кон целното ниво од 2 отсто.
Дополнителен фактор кој создава притисок врз инфлацијата се цените на нафтата. Тие минатата недела пораснале за повеќе од 5 отсто, што може дополнително да го отежне намалувањето на инфлацијата. Во услови на неизвесност околу мировните преговори меѓу САД и Иран и ограниченото движење низ Ормускиот теснец, важна рута за транспорт на нафта од Блискиот Исток, пазарите очекуваат дека Федералните резерви би можеле најмалку еднаш да ги зголемат каматните стапки до крајот на годината.
