Од утре на пладне, а во наредните седум дена, сите гранични премини за товарен сообраќај во Македонија ќе бидат целосно блокирани, како дел од голем регионален протест на камионските превозници од Србија, Босна и Херцеговина, Црна Гора и Македонија. Протестот е реакција на новиот систем за влез и излез од Европската унија, според кој се брои времето на престој на возачите во ЕУ, што според превозниците значително го скратува легалниот период за работа и го поскапува транспортот на стоки.
Според Билјана Муратовска од Транспортната асоцијација „Макам-транс“, граничните премини што ќе бидат затворени се: Деве Баир, Делчево, Ново Село, Дојран, Богородица, Меџитлија, Ќафасан, Блато на Дебар и Блаце. Единствениот премин кој ќе остане отворен од македонска страна е Табановце, но таму блокада ќе вршат српските превозници.
Муратовска нагласи дека системот кој почнува од 10 април, кога ќе стартува електронското броење, ќе ја поскапи транспортната индустрија и ќе создаде сериозни економски последици за цел Западен Балкан. Таа потенцира дека веќе има случаи на санкционирани превозници, со приведувања, депортации и казни, и тоа иако станува збор за легални работници, а не за мигранти или криминалци.
Првиот човек на Стопанската комора, Бранко Азески, предупреди дека блокадата не решава ништо за подобрување на системот во ЕУ, а создава сериозни проблеми за економиите на регионот. Тој најави дека протестите ќе се проширaт и во другите погодени земји, очекувајќи повлекување на одлуката.
Министерот за транспорт Александар Николоски истакна дека се работи за сериозен проблем, кој е дискутиран со ЕУ, но засега без разбирање. Превозниците бараат решение слично на оној што важи за кабинскиот персонал во авионскиот, бродскиот и железничкиот транспорт, со што би се овозможило отстапка и за товарниот транспорт.
Граѓаните и патничкиот сообраќај нема да бидат погодени, блокадата важи исклучиво за товарните возила, но економските последици се очекуваат сериозни доколку протестот продолжи во најавените рамки.
