Европскиот парламент направи голем чекор кон зајакнување на правата на патниците во воздушниот сообраќај, откако со огромно мнозинство го одобри новиот договор со земјите членки на Европската Унија. Со 646 гласа „за“, европратениците ја поддржаа регулативата која треба значително да ја подобри заштитата на патниците при доцнење, откажување на летови и други проблеми со авионскиот превоз.
И покрај долгогодишните напори на Европската комисија и Советот на ЕУ да се зголемат временските граници по кои патниците би имале право на финансиски надомест, со цел да се намалат трошоците за авиокомпаниите, Европскиот парламент одлучи да ги задржи постојните стандарди и да застане зад интересите на граѓаните.
Според новите правила, патниците и понатаму ќе имаат право на финансиска компензација од 250 до 600 евра доколку нивниот лет биде откажан или доколку доцни најмалку три часа. Висината на надоместот ќе зависи од растојанието на патувањето.
За подолгите летови, односно оние над 3.500 километри, предвидени се најголеми компензации. Патниците ќе добијат 300 евра доколку доцнењето трае од три до четири часа, додека при доцнење подолго од четири часа или целосно откажување на летот, надоместот ќе достигне до 600 евра.
Авиокомпаниите ќе можат да бидат ослободени од обврската за исплата само во исклучителни ситуации кои не зависат од нив, односно во случаи на таканаречена „виша сила“. Во оваа категорија спаѓаат воени конфликти, природни катастрофи, екстремни временски услови или штрајкови на аеродромскиот персонал.
Новата регулатива не се однесува само на финансиската компензација, туку воведува и дополнителни обврски за авиокомпаниите додека патниците чекаат на аеродромите.
Компаниите ќе мора да обезбедат освежување за патниците на секои два часа доцнење, бесплатен оброк по три часа чекање и дополнителен оброк на секои пет часа потоа. Покрај тоа, патниците ќе имаат право на бесплатен пристап до интернет и можност за два телефонски повици.
Доколку доцнењето продолжи во текот на ноќта, авиокомпанијата ќе биде должна да обезбеди бесплатно хотелско сместување, како и превоз од аеродромот до хотелот и назад.
Една од најзначајните промени што ги носи новиот систем е укинувањето на практиката со која авиокомпаниите го поништуваа повратниот билет ако патникот не го искористел првиот лет од патувањето. Оваа мерка беше оценувана како неправедна кон патниците, бидејќи многумина губеа право на враќање иако билетот бил целосно платен.
Дополнително, се воведуваат правила со кои треба да се спречи скриено зголемување на цените на авионските билети. Сите билети во Европската Унија во основната цена ќе мора задолжително да вклучуваат најмалку едно парче рачен багаж.
Новите правила носат олеснувања и за семејствата и лицата со посебни потреби. Децата помлади од 14 години ќе имаат гарантирано бесплатно седење до своите родители или придружници, а истото ќе важи и за лицата со инвалидитет кои патуваат со придружба.
Патниците ќе добијат и можност бесплатно да ги исправат печатните грешки во имињата на билетите, под услов корекцијата да биде направена најдоцна 48 часа пред планираното полетување.
Со оваа одлука Европскиот парламент испраќа порака дека заштитата на патниците останува приоритет, но за целосно стапување во сила на новите правила потребно е уште формално одобрување од Советот на Европската Унија.
