Во замрзнувач пронајдено тело на пензионер, уапсен синот
Грчката полиција уапси 55-годишен маж кој е осомничен дека со години го чувал телото на својот татко во замрзнувач, за да продолжи да ја прима неговата пензија.
Според истрагата, телото на 90-годишниот пензиониран учител било скриено во замрзнувач сместен во подрумот на напуштен хотел што му припаѓал на семејството. Властите засега немаат индиции дека старецот починал од нешто друго освен од природна смрт.
Случајот бил откриен откако жители на селото Мистрас пријавиле дека со години не го виделе пензионерот. При разговор со полицијата, осомничениот признал дека неговиот татко починал пред околу две и пол години и дека по смртта го ставил телото во замрзнувачот.
Против него се поднесени обвиненија за измама и давање лажни изјави, додека истрагата продолжува за да се утврдат сите околности на случајот.
