Основното јавно обвинителство Скопје покрена обвинение против Сашко Јанчев, пратеник од политичката партија Левица, поради основано сомнение за сторено кривично дело „тешки дела против безбедноста на луѓето и имотот во сообраќајот“.
Обвинението произлегува од сообраќајната несреќа што се случи на 14 септември, по полноќ, во скопското село Марино, во која трагично го загуби животот 16-годишниот Матеј Димовски, додека 13-годишно девојче, кое било сопатник, се здоби со тешки телесни повреди.
Од Обвинителството информираат дека по спроведена детална истражна постапка биле обезбедени сите релевантни докази, како и извршени сообраќајно-технички и медицински вештачења, врз основа на кои се утврдиле причините и текот на несреќата.
Според обвинението, Јанчев управувал патничко возило „Хјундаи Тусон“ и при изведување на маневар не ги почитувал сообраќајните правила, со што го довел во опасност јавниот сообраќај и безбедноста на другите учесници.
„Обвинетиот извршил непрописно свртување без претходно да се увери дека тоа може да го направи безбедно и без да ги загрози останатите учесници во сообраќајот“, соопштува Обвинителството.
Во истиот момент, во неговото возило удрил мотоцикл марка „Јијинг“, кој бил без регистарски таблички и без соодветна светлосна сигнализација. Мотоциклот го управувал малолетникот кој немал возачка дозвола, а ниту тој ниту неговата сопатничка носеле заштитни кациги.
Како резултат на здобиените тешки повреди, 16-годишниот возач на мотоциклот подоцна починал, додека девојчето било хоспитализирано со сериозни телесни повреди.
