Нова тревога во Африка поради ширењето на смртоносниот вирус ебола. Нигерија потврди случај на зараза во главниот град Абуџа, додека здравствените власти предупредуваат дека епидемијата станува сè посериозна и зафаќа нови земји.
Заразената е жена која неодамна престојувала во Источна Африка, а во Нигерија пристигнала преку Уганда. Според министерот за здравство, Мухамед Али Пате, инфекцијата била лабораториски потврдена на 20 октомври, по што пациентката била ставена во изолација и добила медицинска нега.
Здравствените служби веќе идентификувале 44 лица кои биле во контакт со заразената жена, а во тек е нивно следење за навремено откривање евентуални нови случаи.
Надлежните дополнително истражуваат каде точно се заразила пациентката, бидејќи претходно патувала и во Демократска Република Конго. Уганда, низ која транзитирала, соопшти дека во моментот нема активни потврдени случаи на болеста.
Епидемијата, која започна во мај годинава во Демократска Република Конго, досега однесе илјадници животи. Според податоците на Светската здравствена организација од 19 октомври, во земјата се потврдени 9.637 заразени и 4.646 починати лица, што претставува стапка на смртност од приближно 48 проценти.
Вирусот веќе е регистриран и во други земји. Кенија пријави девет заразени лица, додека Уганда претходно успеа да го запре локалното ширење на инфекцијата.
Особена загриженост предизвикува фактот што актуелната епидемија е предизвикана од видот Бундибуџо, за кој засега нема одобрена специфична вакцина или терапија, иако научните истражувања продолжуваат.
Еболата е опасна вирусна болест која може да предизвика висока температура, слабост, повраќање, дијареја, оштетување на органите, а кај дел од пациентите и внатрешно или надворешно крвавење. Вирусот се пренесува преку директен контакт со заразени телесни течности.
Нигерија веќе еднаш успешно се справи со ебола, во 2014 година, кога со брза реакција на здравствените служби беше спречено пошироко ширење на заразата. Сега властите повторно ги засилуваат контролите, лабораториските тестирања и следењето на контактите, во обид да спречат нова здравствена криза.
