Трагична вест го потресе светот на рагбито откако познатиот јужноафрикански рагбист Хајрон Ендрус почина на само 31-годишна возраст. Спортистот бил пронајден во бесознание во туш-кабината во хотелот каде што престојувал со својот тим, непосредно пред натпревар во Франција.
По неговата ненадејна смрт, надлежните започнале истрага за да утврдат што точно се случило. Се разгледувале неколку можни причини, меѓу кои пад, срцев удар и пукање на крвен сад.
Резултатите од обдукцијата ја откриле причината за смртта. Ендрус починал поради пукање на аортата, главната артерија која ја пренесува крвта од срцето кон останатите делови од телото.
Како последица на пукањето, дошло до собирање крв во обвивката околу срцето, што предизвикало фатални компликации.
Станува збор за исклучително опасна медицинска состојба која може да биде поврзана со недијагностициран висок крвен притисок или вродени срцеви аномалии.
Зад починатиот спортист останале сопругата Мејглин и нивните две мали деца. Неговото тело сè уште не е пренесено во родната Јужноафриканска Република, а семејството побарало приватност и разбирање во овие тешки моменти.
И покрај огромната тага, неговите соиграчи од Лајонс одлучиле да го одиграат натпреварот против француски Ла Рошел во негова чест.
На стадионот „Марсел Дефландр“ биле забележани исклучително емотивни сцени. Домашните навивачи ги поздравиле гостинските рагбисти со аплауз, додека неколку соиграчи на Ендрус не можеле да ги задржат солзите за време на минутата молк посветена на починатиот спортист.
