По повеќе од две години од трагичниот настан, истрагата за убиството на лекарот Ацо Трповски доби нов развој. Министерството за внатрешни работи, по наредби на јавен обвинител и прибрани докази, приведе две лица – сопружници за кои постои основано сомнение дека се поврзани со убиството.
Според информациите од Основното јавно обвинителство Скопје, 65-годишен маж е осомничен за директно извршување на кривичното дело „Убиство“, додека неговата 59-годишна сопруга е осомничена дека му помогнала по извршувањето на злосторството, односно дека придонела за прикривање на трагите.
Случајот се однесува на настанот од 21 март 2024 година, кога телото на лекарот беше пронајдено во возило на паркинг во скопската населба Автокоманда.
Од обвинителството соопштија дека осомничената жена претходно се договорила да се сретне со Трповски на одредена локација. Според нивните сознанија, откако таа влегла во неговото возило, пристигнал нејзиниот сопруг.
Во тој момент, осомничениот наводно ја отворил вратата од автомобилот и го извлекол лекарот, по што меѓу нив започнала расправија. Обвинителството тврди дека потоа тој извадил нож и му нанел повеќе повреди, по што Трповски починал.
По настанот, според истрагата, сопружниците заедно го префрлиле телото во автомобилот. Возилото било однесено до паркингот кај Поликлиниката Железара, каде телото било оставено на возачкото седиште.
Обвинителството наведува дека жената потоа наводно ги отстранила трагите од возилото, по што двајцата го напуштиле местото.
По обезбедените докази, јавниот обвинител до Основниот кривичен суд Скопје доставил предлог за определување мерка притвор за двајцата осомничени.
Истрагата продолжува, а надлежните органи треба да ги утврдат сите околности, мотивот и целосната улога на секое од лицата опфатени во случајот.
