Обвинителството во Буенос Аирес побара затворски казни од четири до 12 години за шестмина здравствени работници кои се грижеле за Диего Марадона во неговите последни денови во ноември 2020 година.
Во завршните зборови, обвинителот Патрицио Ферари ја критикувал организацијата на медицинската грижа, оценувајќи дека била хаотична и дека фудбалската легенда не го добила потребниот надзор.
Обвинителството ги поделило обвинетите во две групи, во зависност од степенот на одговорност што им се става на товар.
За тројца здравствени работници се побарани казни од осум до 12 години затвор, при што обвинителството смета дека нивните постапки биле преземени со свест дека можат да доведат до смрт.
За преостанатите тројца обвинети е побарана поблага правна квалификација, со затворски казни од четири до пет години.
Од барањето за казна е изземен седмиот обвинет, лекар кој не бил дел од постојаниот медицински тим и кој, според информациите од постапката, го посетил Марадона само еднаш во периодот на неговото домашно закрепнување.
Диего Марадона почина на 25 ноември 2020 година, на 60-годишна возраст, во приватна резиденција во Буенос Аирес.
Судот сега треба да одлучи дали и во колкав степен членовите на медицинскиот тим сносат кривична одговорност за неговата смрт.
