Хрватската и регионалната рок-сцена останаа без еден од своите најпрепознатливи музичари – Горан Баре, фронтменот на култната група „Мајке“, почина на 62-годишна возраст.
Веста за неговата смрт ја потврдиле членовите на бендот Марио Рашиќ и Ален Тибљаш.
Според нивните изјави за „Вечерњи лист“, Баре бил пронајден без знаци на живот денеска околу 13 часот во својот стан.
Членовите на бендот навеле дека во изминатите неколку години се обидувале да го убедат да побара стручна помош поради здравствените проблеми со кои се соочувал.
Горан Баре важеше за една од највпечатливите и најавтентични личности на хрватската рок-сцена.
Како фронтмен, пејач и автор на „Мајке“, зад себе остави песни кои одбележаа повеќе генерации слушатели низ регионот.
Меѓу најпознатите композиции на групата се „Тешке боје“, „Мене не занима“, „Вријеме је да се крене“ и „Буди поносан“.
Неговата музичка кариера беше препознатлива по специфичниот вокал, силните концертни настапи и директниот авторски израз.
Со „Мајке“ изгради култен статус и остави значаен белег во историјата на регионалната рок-музика.
Само неколку недели пред смртта, кон крајот на септември, на Баре му се слошило за време на концерт во Макарска.
Настапот тогаш бил прекинат уште по првата песна, а бендот подоцна објавил дека следува двомесечна пауза со цел пејачот да се одмори и да закрепне.
Со смртта на Горан Баре, регионалната музичка сцена загуби уметник чиј препознатлив глас, песни и настапи оставија траен белег кај генерации љубители на рок-музиката.
