Крсто Вујиќ (44), познат под прекарот Терминатор, кој во април беше смртно ранет во Барселона, ќе биде погребан во Црна Гора откако неговото тело по околу шест месеци било пренесено од Шпанија.
Во пресрет на погребот, внимание во јавноста привлекле две различни посмртници, потпишани од две жени кои Вујиќ го наведуваат како свој сопруг.
Според српските медиуми, Вујиќ наводно со години водел двоен живот. Во Црна Гора имал сопруга и две деца, додека за време на престојот во Шпанија, според објавените информации, живеел со друга жена со која исто така имал син.
Во едната посмртница се наведуваат сопругата, ќерката, синот, мајката и поширокото семејство.
Истовремено била објавена и друга, многу емотивна посмртница, потпишана од друга жена како негова сопруга, која пишува за нивниот заеднички живот и синот што го добиле.
Токму појавувањето на двете посмртници повторно ги отвори прашањата за приватниот живот што Вујиќ го водел додека престојувал во Шпанија.
Вујиќ беше тешко ранет на 14 април во пукање во Барселона, а четири дена подоцна им подлегна на повредите.
Според тогашните информации, тој седел во градина на кафуле со жена и бебе кога му пришле најмалку двајца маскирани напаѓачи и отвориле оган.
Бил погоден со повеќе куршуми во пределот на главата и вратот. На местото му помогнала жена која се нашла во близина и се обидела да го запре крвавењето до пристигнувањето на Итната помош, но Вујиќ починал четири дена подоцна.
Шпанските истражители, според медиумските извештаи, се сомневале дека нападот бил однапред планиран.
Неговото убиство се доведува во контекст на долгогодишниот судир меѓу таканаречените шкаљарски и кавачки криминални групи, иако конечниот мотив за нападот не е официјално потврден.
Во дел од медиумите се појавија и сомнежи дека ликвидацијата можеби претставувала одмазда за убиството на Филип Кнежевиќ, кој беше убиен во Барселона во јули 2025 година.
Вујиќ и претходно бил цел на повеќе напади. Во 2016 година бил повреден при експлозија на бомба поставена под автомобил, а една година подоцна повторно било пукано кон него. Во 2018 година бил ранет во семејна куќа во Мељине.
Црногорските органи со години трагале по него, а против него била распишана и меѓународна потерница поради сомнение дека бил поврзан со криминална група која се доведувала во врска со убиството на Шќепан Рогановиќ.
Неговото тело дури сега било пренесено во Црна Гора, по завршувањето на потребните процедури во Шпанија поврзани со насилната смрт и истрагата.
