Пакистански суд го осуди поранешниот премиер Имран Кан и неговата сопруга Бушра Биби на по 17 години затвор поради корупција поврзана со купување луксузни подароци наменети за државата по значително пониска цена.
Според судската одлука, двајцата добија 10 години затвор за кршење на довербата според кривичниот законик и дополнителни седум години според законите за борба против корупцијата, како и парична казна од 16,4 милиони пакистански рупии (околу 50.000 евра) по лице.
Адвокатот на Кан, Рана Мудасар Умер, изјави за Ројтерс дека пресудата била објавена без судот целосно да ја сослуша одбраната.
„Судот ја објави пресудата без да ја разгледа нашата одбрана и ги осуди Имран Кан и Бушра Биби на 17 години затвор со високи парични казни“, изјави Умер.
Случајот се однесува на луксузни часовници и други подароци што Кан ги добил од саудискиот престолонаследник Мохамед бин Салман за време на официјални посети. Обвинителството тврди дека Кан и неговата сопруга подоцна ги купиле подароците од државата по намалена цена, што е спротивно на правилата за државни подароци во Пакистан.
Ова е најновата пресуда во низата правни проблеми за Кан, кој се наоѓа во затвор од август 2023 година. По неговото соборување од функцијата во 2022 година, против него се поднесени десетици обвиненија, вклучувајќи поткуп и протекување државни тајни.
Имран Кан ги негира сите обвинувања, додека неговата партија тврди дека случаите се политички мотивирани.
