Нови детали за неуспешното погубување на Криста Пајк во американската сојузна држава Тенеси откриваат сериозни пропусти при обидот за извршување на смртната казна.
Нејзиниот адвокат, Ренди Спајви, објавил хронологија на случувањата во собата за погубување, според која медицинскиот тим речиси еден час се обидувал да воспостави интравенски пристап.
Во текот на постапката биле употребени дури десет игли, а членовите на тимот повеќепати изразиле сомневање дека вената можеби е пробиена.
Обидите започнале во 18:35 часот, а уште во 18:53 еден од членовите предупредил на можен проблем. И покрај неизвесноста дали иглата е правилно поставена, постапката продолжила.
На осуденичката ѝ било соопштено дека е пронајдена вена, по што започнало вбризгувањето на пентобарбитал.
Во 19:34 часот, според објавената хронологија, Пајк почнала да вика од болка.
„Чувствувам како раката да ќе ми пукне! Ме пече!“, извикала таа.
И покрај применетата смртоносна супстанција, затвореничката останала жива, по што погубувањето било прекинато.
Според објавените информации, таа поминала десет дена во болница пред да биде вратена во затворот во Нешвил. Сега може да зборува и да оди, но долгорочните здравствени последици сè уште не се познати.
Експертите претпоставуваат дека поради оштетување на вената, супстанцијата завршила во ткивото на раката наместо директно во крвотокот.
Случајот предизвикал жестоки реакции во САД, а гувернерот на Тенеси, Бил Ли, ги суспендирал сите погубувања во сојузната држава до завршувањето на официјалната ревизија на постапката.
