Кавадарци е потресен од морничава семејна трагедија, во која 43-годишен маж е обвинет дека го убил својот помлад брат на неговиот роденден, воден од алчност и желба да го присвои имотот.
Според обвинението на Основното јавно обвинителство Кавадарци, браќата прво влегле во жестока расправија, по што обвинетиот гневно посегнал по тесла и неколку пати го удрил брат му по главата. Ударите биле фатални, а жртвата починала на самото место.
По злосторството, наместо да повика полиција, обвинетиот ладнокрвно го напуштил местото на настанот. Но, следниот ден се вратил — не за да се пријави, туку за да ги прикрие трагите. Според обвинението, внимателно ја чистел крвта, а телото на брат му прво го сокрил во бањата, па подоцна го преместил во шупа, каде што го затрупал во ров и го покрил со дрвени табли и други предмети.
Додека семејството и соседите сè уште не го пријавиле исчезнувањето, обвинетиот користел банкарска картичка на жртвата, подигнувајќи пари во неколку наврати меѓу 30 јули и 5 август.
Телото било пронајдено на 5 август, по што истрагата ја открила целата мрачна вистина за ова грозоморно убиство.
Обвинителството поднесе обвинителен акт за тешко убиство по член 123 став 2 точка 4 од Кривичниот законик, а за обвинетиот е побарано продолжување на притворот додека трае постапката.
Настанот ја шокира јавноста во Кавадарци – братоубиство извршено со бруталност и ладнокрвност, што остави без зборови дури и најискусни истражители.
