Македонската јавност изгуби еден од своите најавтентични гласови. На 64-годишна возраст, по долго боледување, почина Рамуш Муарем – Цирко, новинар, уредник, актер и активист кој остави длабока трага во медиумите и во борбата за правата на Ромите.
Цирко засекогаш ќе остане запаметен по култната емисија „Циркотека“ на БТР телевизија – шоу кое со својот специфичен хумор, спонтаност и незаборавни гафови допре до илјадници гледачи. Неговите настапи и денес се вирални на социјалните мрежи, потсетувајќи на енергијата што ја носеше.
Веста за неговата смрт предизвика лавина од емотивни пораки. Меѓу првите што јавно се збогуваа беше Габриел Бајрам, кој истакна дека Цирко бил човек што ширел надеж дури и во најтешките времиња.
Но Рамуш Муарем не беше само медиумска личност – тој беше еден од најгласните борци за еднаквост и достоинство на ромската заедница. Неговата посветеност на правата на маргинализираните и на поврзувањето на луѓето останува како аманет за идните генерации.
Со неговото заминување, македонското новинарство изгуби професионалец со уникатна енергија, а ромската заедница – еден од своите најсилни гласови. Цирко останува симбол на храброст, автентичност и борба за правда.
