Рускиот генерал-полковник Станислав Петров, поранешен командант на силите за радијациска, хемиска и биолошка заштита (РКБО), е пронајден мртов во својот стан во Москва. Според првичните информации, 87-годишниот пензиониран генерал бил откриен од блиските во раните утрински часови на 2 април во познатата зграда „Куќа на насипот“.
Полициски извори наведуваат дека покрај телото бил пронајден пиштол, а првичните проценки укажуваат на можност за самоубиство. Медицински извори додаваат дека Петров во последниот период боледувал од тешка болест.
Петров беше една од најзначајните личности во областа на хемиската одбрана – последен командант на советските сили за хемиска заштита до 1992 година, а потоа и раководител на новоформираните руски единици за РКБО до 2001 година. По пензионирањето остана активен во воено-научниот сектор, како главен уредник на стручно списание и истражувач во центар при Министерството за одбрана.
Смртта на Петров доаѓа во период на засилени меѓународни тензии и обвинувања за употреба на хемиски агенси во конфликтот во Украина – токму област во која тој беше авторитет. Дел од институциите со кои работел се под меѓународни санкции, што дополнително ја засилува драматичноста на случајот.
Руските надлежни органи отворија истрага за да се утврдат околностите околу смртта.
