Тешка семејна трагедија го потресе Австралија, откако 45-годишна мајка ги повредила своите три деца со нож, а потоа и самата била пронајдена со сериозни повреди. Едно од децата, петгодишно, починало, додека другите две, и двете помлади од пет години, се во критична состојба.
Полицијата соопшти дека жената, според досегашните сознанија, сама си ги нанела повредите. Таа била пронајдена на местото на настанот, откако велосипедисти кои минувале низ областа забележале што се случува и се упатиле да помогнат.
Веднаш биле повикани службите за итни случаи, но петгодишното дете починало пред да пристигне медицинската екипа.
Една од сведоците, Џули Сакара, раскажала дека меѓу повредените деца видела и бебе.
„Видов жена како лежи во грмушка и бебе на седиште, додека друга жена се обидуваше да ѝ помогне. Од другата страна имаше уште едно дете. Не сфатив веднаш дека има три од нив, сите само се обидуваа да помогнат“, изјавила таа.
Полицијата потврдила дека повредената жена е мајка на трите деца. Доколку преживее и нејзината состојба се стабилизира, таа би можела да се соочи со обвинение за убиство.
Инцидентот се случил на влезот од празен паркинг, каде што жената претходно го оставила својот автомобил. Според досегашните информации, полицијата верува дека целиот настан се одвивал токму на таа локација.
Таткото на децата бил известен за трагедијата. Во моментот кога се случил инцидентот, тој бил на работа.
Истрагата за околностите под кои дошло до трагичниот настан продолжува.
