Грчката полиција уапси двајца пакистански државјани на возраст од 40 и 34 години, осомничени за учество во брутален напад врз 41-годишен сонародник во Солун.
Според пријавата на жртвата, шестмина мажи физички и сексуално го нападнале, го повредиле со нож, а потоа го фрлиле во морето.
Инцидентот се случил рано во вторникот, на отворен простор во близина на црквата „Сите светци“, во западниот дел на градот.
Четириесет и едногодишниот маж пријавил дека бил претепан и сексуално нападнат од групата, додека еден од напаѓачите наводно го снимал насилството.
При нападот се здобил и со повреда од нож во пределот на раката.
Го однеле во центарот и го фрлиле во морето
Според неговото сведочење, осомничените потоа го качиле на мотоцикл, го пренеле до центарот на Солун и го фрлиле во Солунскиот Залив.
По инцидентот, мажот бил пренесен со возило на итната медицинска помош во болница, каде што му била укажана лекарска помош.
Двајца уапсени, по четворица се трага
Полициските службеници во средата наутро успеале да лоцираат и уапсат двајца од осомничените во населбата Амбелокипи.
Против нив е поведена постапка за повеќе тешки кривични дела, меѓу кои силување, обид за убиство и прекршување на законските прописи за оружје и заштита на личните податоци, согласно дејствијата што им се ставаат на товар.
Полицијата продолжува да трага по преостанатите четворица осомничени, додека уапсените треба да бидат изведени пред надлежен обвинител.
Истрагата треба да ги утврди сите околности на случајот и поединечната одговорност на осомничените.
