Американската актерка Кејли Хотл (Kaylee Hottle), која глумеше во филмскиот серијал „Godzilla vs. Kong“, загина во сообраќајна несреќа на 18-годишна возраст.
Хотл, која беше глува, ја толкуваше улогата на младата сирачка Џија во филмскиот блокбастер од 2021 година, а истата улога ја повтори и во продолжението од 2024 година, „Godzilla x Kong: The New Empire“.
Нејзиниот татко, Џошуа Хотл, објави видео-изјава преку Фејсбук користејќи американски знаковен јазик, со што ги потврди деталите за нејзината смрт.
Полициските службеници во Фредерик, Мериленд, соопштија дека се верува оти „прекумерната брзина“ била фактор за сообраќајната несреќа во која учествувало само едно возило во вторникот наутро.
Училиштето за глуви во Тексас, каде што учела Хотл, исто така ја сподели веста со „длабока тага“.
„Нашите срца се со семејството, пријателите, соучениците на Кејли и со сите што ја познаваа и ја сакаа во овој исклучително тежок период“, се вели во соопштението објавено на Инстаграм.
Во соопштението исто така се апелира да се почитува приватноста на нејзиното семејство и да не се шпекулира за несреќата.
Филмското студио „Warner Bros“, кое ги дистрибуираше популарните филмови со чудовишта, ѝ оддаде почит на актерката преку објава со нејзина фотографија на платформата Икс (X).
Шерифската канцеларија на округот Фредерик соопшти дека замениците биле повикани на местото на несреќката во Иџамсвил околу 02:50 часот по локално време.
Полицијата соопшти дека 19-годишниот возач бил пренесен во болница за санирање на повреди кои не се опасни по живот, додека вториот патник одбил медицинска помош на местото на настанот.
Хотл глумеше во „Godzilla vs. Kong“ рамо до рамо со холивудските ѕвезди Александар Скарсгард, Мили Боби Браун и Ребека Хол. Нејзината улога во продолжението од 2024 година ѝ донесе и номинација за наградата „Сатурн“ за најдобар млад изведувач во филм.
