Светот на Формула 1 се простува од Алан Џонс, поранешниот светски шампион кој почина на 80-годишна возраст, оставајќи зад себе значајно наследство во најбрзиот автомобилистички спорт.
Австралискиот возач ја освои светската титула во 1980 година, возејќи за тимот на Вилијамс. Со овој успех стана првиот возач во историјата на овој тим кој се искачил на врвот во Формула 1. Воедно, тој беше вториот Австралиец кој успеал да ја освои шампионската титула во ова натпреварување, по легендарниот Џек Бребем.
Веста за неговата смрт ја потврди неговата сопруга Аманда, која со емотивна порака се прости од него и им се обрати на сите што го познавале и го следеле неговиот спортски пат.
„Со голема тага ја известуваме јавноста дека нашиот сакан Алан почина. Многу ќе ни недостига, а сите што го познаваа, како и неговите бројни обожаватели, ќе го паметат со љубов“, порача таа.
Џонс зад себе остави богата и успешна кариера во Формула 1. Во текот на своите настапи забележа 12 победи и дури 24 пласмани на победничкиот подиум, настапувајќи за неколку познати тимови во шампионатот.
Меѓу екипите за кои возеше беа Хескет, Хил, Сартис, Шедоу, Вилијамс, Ароус и Хас.
Неговото име засекогаш ќе остане запишано во историјата на Формула 1, особено поради историскиот успех со Вилијамс во 1980 година, кога стана светски шампион и еден од најзначајните австралиски возачи во овој спорт.
